Ардын жүжигчин А.Очирбат :
"Тэд урлагийн бүх жанер дээр тоглодог байсан"
Та жүжигчин Г.Дашхүүтэй хэдэн оноос хойш хамтран ажиллаж ирсэн бэ?
1970 онд театрт орсон цагаас нь хамтран ажиллаж ирсэн. Тухайн үед би ахмад жүжигчин болсон байлаа. Дашхүү их нийтэч хүн учраас хөгшин залууг ялгалгүй бүгдтэй нь нөхөрлөж явсан юм. Би түүнтэй ахын ёсоор харьцдаг, анд нөхрийн ёсоор хамтран ажилладаг байсан юм.
Та түүнтэй хамтран ямар уран бүтээлүүд хийсэн бэ?
Бид кинонд нэг ч удаа хамтран тоглож байгаагүй, харин жүжигт олон удаа хамтран тоглосон. Хоёр талийгаач маань надтай их нөхөрлөж ханьсдаг байсан юм. Ер нь театр дотроо хамгийн ойр дотно байсан хүн Дашхүү байсан юм. Дашхүүг би загнах үедээ загнаж, хөгжилдөх үедээ хөгжилдөж явлаа.
Дашхүүг хүнийх нь хувьд дурсаач ?
Хүн хүнээ танина гэдэг тийм ч амар зүйл биш. Муухай хүн гэж бодож явтал сайхан тус хүргэдэг хүн байж болно. Энэ хүний ноён нуруу, хүн чанар нь гучаад жилийн хугацаанд надад бүрэн танигдсан. Монгол хүн бүхэн Дашхүүг мэднэ шүү дээ.
Өнөөдөр хошин урлагийн анхдагч гэх хүмүүс тодорсоор байна. Бүр хошин урлагийн хаан гэж цол гараад ирж. Жинхэнэ хошин урлагийн хаад Жанчивдорж, Дашхүү хоёр биш үү. Олон уран бүтээлч ингэж ярихыг сонслоо?
Бүр 1977 оноос манай Хүүхэд Залуучуудын Театрт 4 сарын 1-ний инээдмийн баярыг жинхэнэ утгаар нь тэмдэглэж эхэлсэн юм. Энэ үеэс л элдэв зураг, хошин шог тоглолтыг анх энэ хоёр маань гаргаж ирсэн шүү дээ. Яахын аргагүй анхдагч нар мөн. Энэ хоёрыг зөвхөн хошин урлагийнхан гэж тооцож болохгүй. Урлагийн бүх жанер дээр тоглодог байсан юм. Би өнөөдөр Батзаяад тийм цол өгснийг ойлгохгүй байна. Хэрвээ Батзаяа өөрийгөө анхдагч гэж нэрлэсэн бол би их гайхаж байна.
Ярилцсан : А.Солонго, М.Хангай
Post a Comment